Enti i sigurimeve shoqërore të Bujqësisë (OGA) u ka hequr pensionet 3.500 homogjenëve, pasi nuk kanë depozituar brenda afatit ligjor dokumentacionin që iu kërkua nga Ministiria e Punës dhe Sigurimeve Shoqërore.

Lajmin e bëri të ditur vetë ministri i punës dhe sigurimeve shoqërore, Jorgos Kutrumanis, nëpërmjet një shkrese drejtuar deputetit të LAOS, Thanasis Plevris, njofton agjencia e lajmeve greke AMNA.

Ministri bën me dije se në kuadër të zbatimit të mënyrës së re të pagesës së pensioneve nëpërmjet llogarive bankare, u krye regjistrimi dhe verifikimi i të gjithë pensionistëve që përfitojnë pension nga OGA-ja (me vlerë 360 euro) dhe kanë lindur në Shqipëri.

“Në kuadër të verifikimit u kërkuan për këtë kategori pensionistësh dokumenta të reja, siç është letërnjoftimi i ri shqiptar dhe pasaporta biometrike, si dhe çertifikata lindjeje dhe gjendjeje familjare”, thuhet në shkresën e ministrit e cila sqaron se: “Deri më sot. Sipas të dhënave që ka kompjuterizuar OGA-ja, u depozituan dokumenta nga 17.130 persona, pensionistë homogjenë nga Shqipëria. Nga këta, në 3.500 raste u krye ndërprerja e dhënies së pensionit, pasi nuk dorëzuan dokumentet e kërkuara brenda afateve ligjore”.

Deputeti i LAOS-it, në pyetjen e tij iu referohej, siç thoshte, denoncimeve, sipas të cilave “emigrantë klandestinë përfitonin në mënyrë të parregullt pension nga OGA-ja”, madje kishte paraqitur dhe 15 emra shtetasish të huaj që sipas tij merrnin pension pa plotësuar kushtet.

Ministri i punës në përgjigjen e tij, garanton se asnjeri prej emrave të përmendur nga deputeti nuk përfiton në mënyrë të paligjshme pension nga enti i sigurimeve shoqërore të Bujqësisë (OGA).

Nëse dëshironi të ndiqni vazhdimisht lajmet nga Greqia, Shqipëria dhe Rajoni bëni like në faqen e Albanews.gr në Facebook duke klikuar këtu.

Dyfisho vlerën e kartës së parë të muajit me FROG!